TRIBAL MINNA 3BILL KIDOUDAL HI PHACHOM TALOU DING AHI

~ By Mark Haokip                                                                                 Lamka, May 13, 2016: 03:33pm IST:

 

'Tribal' minna 3Bill ana kidoudal chu Bill passed ahijouva sopi khat hina jal'a common issue khat a mass movement umdoh na leh namkhat chikhat, kikhenthei lou sopi hina guitanlou umdoh thei nalai tah chu ahibouve. Manipur context a Naga panglouva Tribal mina movement kibol kiti chu political identity kicheh lou vetsahna ahin, hiche political identity kichehlou puma movement kibol kiti chu foreigner kahiuve tina ahin native people hilou khol gammi hungpemlut tina ahi.

1. Ipi jeh a Tribal mina movement bol ding hi phalou ham?
Manipur context a chu Tribal mina movement bol ding ahivang leh Kuki leh Naga kigom khom uva abol diu dol ahin, Kuki le Naga chu akithokhom teng leh bou a wave chu Tribal mina gingdoh thei bou ahi.

2. NSCN(IM) in India govt. toh Framework Agreement ahin nei phat in, Kuki lamkai hon Delhi khopia Th. Muivah ana kimupi un hiva chun, hitidol hin memorandum ana polut un ahi: Sadar Hills, Ccpur le Chandel hi Kuki ho gam hitin, Ukhrul Senapati leh Tamenglong hi Greater Nagalim a lut hen, hiti ding chun kinoptona MoU neiyu tin, Kuki-Naga kitho khom utin Tribal State delu tin, imu tengu leh agam chu kihom taute, tia thu ana lhut u ahi. Hijong leh Muivah in, "Nangho Mizo bus in nadalha tauvin, keiho Naga bus a cheding kahitauve, nahung jaonomu le vang most welcome, najaonom lou leu nangho thu ahitai, hijeh chun Kuki le Naga pangkhom thei ponte, tin ahin vailhah un ahi.

3. Hitia Muivah in ahin vailha uva pat a chu Tribal mina political movement Kuki le Naga in bolkhom ding chu ahitheina thi ahitai. Hiche nikhoa pat a chu Tribal mina movement bol theina dingbchu thi ahitai katina ahi.

4. Chutia Tribal minpan a BILL3 doudal ding jong chu recognised political identity ahilou jeh in 3Bill toh kisai a ivet leh Foreigner kahiuve tia recognition movement bol hina ahibouvin ahi. Hijeh a chu Hiche Bill 3 hi Kuki minna bou kidoudal thei ding ahin, hiche recognised political identity "KUKI" mina idel leh constitutional safeguard kichang theibou ahin, chule Separate state jong chu hiche mina bou muthei hibep ding ahi.

5. Hiche Bill 3 hi Kuki le Naga hilou nammi ho, foreigner ho deldoh nadinga passed kibol ahi.

6. Naga ten keiho achom kahitauve tia kicheh tah a Naga mina movement abol tah jeh uva, Kuki le Naga pankhoma Tribal mina movement bol ding chu amaho dia ahitheilou thil ahijeh a nom hih uva, politics bolna eineikit uva news ahinso phat uleh "Naga&Tribal" ti thucheng hi ahinmanchah uva amin maimai a support lhema ahin lhep u ahi. Hijeh a tua pat Tribal min hi kijang thei talou ding ahidan ama le ama akiphondoh ahitai.