Puimang’a um Deputy Ranger pa le Kangpokpi milham khat kilhadohta

PC: Zalaileng News Service | Kpi District

Written by Kaybie Chongloi,

Zalaileng News Service | Kpi District

KANGGUI, Lhatun 17: Achesa nisim 12 jan’a melhetlou thalchoi hon ana puimang’u Forest Department, Government of Manipur noija Deputy Ranger a natong chule nisim 14 jan’a milham khat kipuimang chu lhadoh in aumlhon tan ahi.

Ginchat umtah thuthang chu, Kangpokpi Ward No. 8 cheng, DFO Kangpokpi a Deputy Ranger, Angam Leivon hi Dangka Lakh 30 toh kikhut lhetdia kipuimang ahi akitin, alangkhat, Kangpokpi Ward No. 2 a cheng milham Lalal Sithou hi ipijeh’a kipuimang ham ti aseichen koima aumthei kitpon hijongle vangphat umtah in dam le bit in janhi Lhatun nisim 16 jingkah lam nidan 11 velchun a inmun ahunglhung tai.

Milham Lalal Sitlhou kilhadoh ni nilhah lam nidan 5:30 velchun Deputy Ranger Angam Leivon jong aman hon ahinlhadoh kit tauvin amavang jan nidan 8:10 vel’in a inmun ahunglhung bep in ahi.

A inmun ahunglhung jouva thusomi hotoh akihoulimna’a, Deputy Ranger Angam Leivon in, eipuimang niuchun jan khovah in lam kajot un, abang le kamit eikanpeh un abangle alhamjiuvin ahi. Ajing jingkah nidan 10 velchun gammang lentah khat kalhung’un thingphung noikhat a eiumpiu vin Hitichun hilai mun’a chun ni 4 tobang chu kahung umin ahi ati.

“Keihi keima suhkhel bolkheljeh’a eiki puimang ahipon, kanatoh na Department toh kisamkaija eiki puimang ahibouvin, hitobang chunga kaumna department in khohsah loutah’a eibol hi phamo kasalheh jing’e, a department mi uva eigellou ham, kum hijat kitah tah le tomngaitah’a kanatoh hi genthei kathohna ding bep le lhaset kilamna bep ham”, tin Angam Leivon in anatohna department DFO Kangpokpi chunga alungkimlouna aphongdoh in ahi.

Aman aseibena’a, eihung puidoh hochu phatah in kadong’e, ipijeh’a kei neimat’u ham, ipi bolkhel suhkhel kanei hitam katile, Hepa nangin imacha suhkhel bolkhel aneipon, na department toh kisamkaija nakiman ahibouve eitiuve chule eipuimang hohin DFO Kangpokpi a hi keihi alenpen dan’a eina gel’u ahi ati.

Hichan geija kanatoh na department jeh’a eikipuimang’a keijong eikidon lou chule kanu longdapsa chung beh’a houlimna le lhamon na thubeh ka department in aseilou hi keidin ana behseh jenge tinjong alunglhai louna le phamo asahna aphongin ahi.

Gamlah’a aumchan’u aseina’a, ei umpi hochu mi gup(6) ahiuvin, amai akijep pol’un thal hoitah tah akichai uve ahin suh gentheina, houset, phoset, imacha einei pouvin, ngailuttah le jana neitah in eibol uve. Katho phat, kachadon phat, ka anneh phat, ka imut phat, inna kaum bang bangin eibolpeh un chule BP nei kahin kalou la kakipoh man tapon hijeng jongle ei umpi hochun ka BP venna din jingkah nilhah in Changkongche, Anphui, Khaoguithei do kitiho eiholpeh jiuvin, buchunga ei uppeh un katahsa jong phatah in eiven peh uve ati.

PC: Zalaileng News Service | Kpi District

Kanatohna Department chanchin, ipi katoh uva koichu koiham tiho tilou thudang imacha him him dongjong eidong pouvin chule thildang a eiki houlimpi pouve hijehchun, sum toh lhetdia eipuimangu ahijong kahepon, ijat athum uva koi hiu ham jong kahepoi ati.

Ei kipumang sungchun keidin imacha lungkhamna kaneipon, kalungkhamna pen chu kadalhah kanu chu ahi atia aseito lhonin, amitlhi olchan akitheh in, “Kanun toh kaki vailhahna banga kavuithei hi phamo kasahpen le kanatna pen ahitai” ati.

Adamlaijin kajochanin angaichat jouse kasu bulhingin eidalhah phat’a angaichat nukhahpen molso joulouva kaum hi kahinkho a kasuhmil theitah louding khat ahitai tinjong aseibei.

Ahung kilhadoh thu aseina’a, nilhah lam nidan 5:30 vel’a chu eihin sol’u ahitan, ipijeh’a eihin lhau ham jong kadonpon, amahon jong hichejeh’a hi kalhau nahitai tijong aseipouve. Nidan 5:45 vel’in kahung kipatdoh in kahung lhaitho tho jeng le Kol khoti khat kahin phan, kol upa naolhang khat kakisuto in, mu athimtah jehchun neihung thah in katile amanjong thupha man louvin aloikhat khut koijin agah kouvin Kholen mol Airtel tower gei khu eihung thah lhonin, Hepa keini kilena ding jong agamlan hilai kon hin chelhon tange atilhonin ken jong pehding la imacha kanei tapon, katin kakipah katin kahung kikhen un, hiche akon a chu kachanga kahung lhaisuh ahitai ati.

Lamlen (NH-2) kahung lhun le sopi ule nao chengin Council leibul’a eina ngaijun, kachol kanan lheh vangin insungmite, sopi cheng somai kamuchun eikipasah lheh’e ati.

Alangkhatna, Deputy Ranger, Angam Leivon kei imacha kahipoi ahijeng vangin dam le bitna lhadoh’a kaumna din Kuki Inpi, CSO, twon kivaihomna’a KTC, KYU, KWWO chule houbung miten adeh’a nuten kijotna geija jong aneiju hi kagel le kakipah behseh jingin, nachang cheh un kipathu kasei joupon, thusomi ho mangcha nachung uva kakipana kaphonge ati.

Source: Kanggui Post

SETNA CHU PHATNA LETHUH'A KPI DISTRICT HI NAM ADIA "LHOKHON DET" A SEMDOH DI AKUL'E

Anun matna um achapa kilhadoh ngahdoh joutalou, Kangpokpi in district pilhing amujou kal ‘lhaset umpen thivui na’ kin nei, nupite kijotna um, matna um teni lhadoh’un tia kiloikhomna tampin ngehna nei’u

SETNA CHU PHATNA LETHUH'A KPI DISTRICT HI NAM ADIA "LHOKHON DET" A SEMDOH DI AKUL'E.

Written by Kaybie Chongloi

KANGPOKPI: Manipur’a Kukite touphana district holah’a nam khankho semna dinga lhokhon’a pangthei pen Kangpokpi District gamkol sunga umdia kilomlou tah, *Sum le paijeh’a mi kipuimang chondan/chena* hin asetna lam amanocheh cheh tolhonin tunin lhaset umtah thilsoh khatna, tehse kum 90 val khat le alha ngaitah achapa toh, tah mel’a kimukit taloudin khenna anasotan ahi.

T. Waichong kho chaga, Kangpokpi Ward No. 8 a pansa, Pi Veijakim Khongsai, kum 92, hi Lhatun nisim 14 chun tahsa dammo jeh’in alei hinkho anabeitan, hijeng jongle achapa banga anei achanu jipa Ml. Angam Leivon hung kilhadoh di ngah in tuni Lhatun nisim 15 nilhah lam chan chu ana ngah in, hinlah ngahdoh jou talouvin leiset a kimuto kit taloudin nilhah lam nidan 4 vel’in vuilem anahitai.

Ml. Angam Leivon hi Forest Department, Govt. of Manipur a Deputy Ranger a natoh nei ahin, Pi Veijakim Khongsai chanu toh kicheng ahi. Pi Veijakim Khongsai hin aloipa (Lhakehtasa) Pu. Thongngul Khongsai in matah’a achesa 1979 kum’a chapa neilouva ana dalhah nunga achanu jipa Ml. Angam Leivon hi chapa banga aneija, chule Ml. Angam Leivon in jong ngailutna bulhing set pum’a nu’a aneija a insung ana vetkol ahitai.

Melhetlou thalchoi ho hidia ginmo phabep in Lhatun nisim 13 jan’a chu Ml. Angam Leivon hi aumna Kangpokpi Ward No. 8 inmun’a kon Dangka Lakh 30 toh kikhut lhetdia ana puimangu ahin, ama kipuimang ni ajinga chu vangset nachung chon’a anu Pi Veijakim Khongsai hi ana mollem kit ahi.

Alangkhatna, jan hi (nisim 14) jan nidan 10:30 velchun Kangpokpi Ward No.2 a cheng Ml. Lalal Sitlhou jong melhetlou thalchoi ho mama hidia ginmo phabep in ana puimang kit un ahi.
Potnatna jal le, gamsung cham le lungmon sunoh’a pangjing hiche ‘sum toh lhehdinga mi kipuimang chondan' hi chim aumtan, lungmonga khosah theina aumtapoi tin nuten tunin Kpi DHQs mun'a kijotna ana neijun, hiche tobang chondan/chena hi koihile gamsunga aboltah lou diuvin nute hinan chate temna aneijun, chule tua puimanga umte ni hi apuimang hon mihem khankhoto najalla ahin lhadoh gel diuvin temna jong aneijun ahi.

Kangpokpi District hopsunga um jalhang kiloikhomna (CSO) ho le Hangmi Students’ Union honjong mopo khat hina jallin mi puimang hon akipuimang teni hi dam le bit na agangthei lam’a ahin lhadoh loi diuvin temna aneijun ahi.

Thalchoi cheh phumelmul’a koima aki kichato umlouna mun gamkol Kangpokpi District sunga hin, gam le nam dia khonunga thil suse thei ijat umhen lang, kon ipibol jongle koima ima seingam in akilha tapon, aseithei dingpen jalhang kiloikhomna ho jong thalchoi ho sot tolol danin imang bep tauvin, *"Hichu adihpoi, hitobang nabol’u hi thilpha ahipoi”* ti theiding inei tapouvin, ham ham’in *Nuten* avetjou lou behseh tengule ahung kipatjiu tilou eiphoh diu le eihil diu inei tapouvin ahi.

Hitia ichungthu’u seiding ho le, iboina uva manchah ding hon kichat thei anei uhi, akichat ho diuvin thanop nop um bangin kilang jongle aphohthei ahilthei neilou thalchoi chu *“Avangse le ahamse chungnung”* ihi loudiu ham.

Ml. Angam Leivon kipuimang na thilsoh hi inamsung uva kikhelna khat semdoh’a apankhah le vang, tutu dinmun’a ama le a insungmite chule japi din lhaset umpen hikha jongle, ihamphatnau lenpen hithei ahi.

Apuimang hohin Ml. Angam Leivon insunga hitobang thilsoh hi hung uminte tin anagel phahih nau vinte ajehchu thina kitihi itihphat’a koichunga achuhding ahe masa koima aumpoi. Amavang hiche tobang dinmun'a hi thalchoi lungpi kengjep, pilhingtah’a lunggel nei le saojep gah galmu phathei ingaichauve.

Mipha hihen lang, gunda hihen lang, aching hihen angol hijongle anatoh na khatna setna alhun’a, asetna chu setsah belouva, asetna laitah mangcha’a thilpha lenjo khat boldoh thei mi chun mihem lungnatna asang ajan adamsah theije tihi mipilhing jousen apom khat ahi.
Ahin hitobanga lunggel neija hangsantah’a boldoh mi alhomin, asuhset thil chu phatna lethuh louva akhohcheh jo’a suse be joh mi atamin, hiche hi nam natna lenpen khat ahina ban’a hitobang lungput chepi ding ahung tamcheh cheh khah le suhdam hoi hitalou ding nam natna ahung hikha ding hi tijat aum’e.

Tutu dinmun’a Ml. Angam Leivon le a insungmite khankho ding hi saotah seihih jongleu hen athu neokhat simdoh’a pilhing lungput nei taphot chun ichangeija lungjin khoisatna, puldou le lhasetna atodiu ham tihi alungmitna kilang jengthei ahi.

Hijehchun, Ml. Angam Leivon puimang hon atup le adoi’u lolhing louva ahin lhadoh diu hi losamna lenchungnung le neona noinungpen in gelkha jongleu, koiman atahsan loupettah a dam le bitna mihem ngailutna khankho’a ahin lhadoh ule sum le pai athum’u chu losam jongleh, vannoijin alolhin nau lenpen thusim’a mangta loudia aseiding ahi.

Chutile, Ml. Angam Leivon le a insungmite natna, gimna, hesohna jouse jong hi lhep thu thu’a, lou le ai choh’a damsah ngai talouva acham’a silhah’a paimang banga damjeng ding, setna chu phatnan aleding ahi.

Chutima chun, Ml. Lalal Sitlhou puimang honjong hin boltaleu ana jouse damin tin, lungmong mo jouse lungmong intin, akap jouse nuijintin, set mitna mujousen phatnan lethuh tauvinte.

Thalchoija nam natong, ka nam sepoy ho, sei le im vang kibang ahitai. I-gamsungu hi sum le pai chule kai don nan alodim tan, koima akidodoh thei aumtapoi. Lungmonga khosathei jong aumtapon, eiho le eiho kivaihomna noija jatdang namdang khut noija hing danin ikilang tauve.

Tehse upan chate hil’in nahil thei tapouvin, nungah gollhang khangthah hon loi le gol bangin ngamsung tah’in ana kivoppi ngam tapouvin, nunao chapang hon ka nam sepoy tin lungmonpi thei talouvin na kichajo tauvin, tonlaija gal thusim cinema a kive, thalchoija uniform kivon’a agam le anam’a dinga natonga um, khosung gamsung alut ule chapang kaplai thip’a, abang kichatjeh’a kapchat, abang anun asimlih, tiho khangtoh ikilou tauve.

Genthei hahsat laija, gam le go huhna’a thingnoi ho natoh phatna jouse hi tun koima kamchenga konin apotdoh jou behseh tapoi, thangtom pi joh louva ajeh hi kholdoh ngaijo ahi. Hiche phatlaija chun thingnoi ana umhih leuveng itiuva tua hi inop ipeh’a iumdiu ham?
Mundang gamdang kahop joupon, hopjong hopda ingting, ajehchu Kangpokpi District mi kahijeh in, Kangpokpi District sunga umcheng hon, i-district u hi nam’a dia amanlutdan kiseipeh tolouvin jong ihisoh keijun, akhantouna ding lamjoh’a hi thingnoi ho *"Contribution"* lentah aumin, akim’a kon hilouvin abul (grass root level) akon napat lou’u akul lhehtai.

Tu dinmun’a nangho beija machalna umtheilou ahitai, ajehchu, japi thuneina hi inachop khup uva nangho thaneina a kal ina se ngal’u ahitan, “Keiho letna kal kisep” tia japi thaneina ijanei gellou lungput hi, nabon chau akitipon, hitobang lungput neihon nahin pailhah uva, Kangpokpi District hi lungmon umpen le nam lhokhon detpen'a apan nathei teidia ima jouse abul akon nahin semtoh diu akul mong mongtai.

Source: Kanggui Post

Kangpokpi chapang khat in themjilna lam'a National Level a Gold Medal mu

Kaybie Chongloi,
KANGGUI, Feb.23: Kangpokpi tedia kithang at umtah le kipa umtah khatna khosung simlai chapang khat in tunaicha chun National Level a themjilna lam toh kisaija kitetna khatna Manipur pumpia din Gold Medal amun ahi.

Kithang-atpi umtah hiche Kangpokpi DHQs akon simlai chapang pahi Ward No. 1 a cheng Lhakehtasa Seigoulen Haokip chapa Satgunmang Haokip ahin tutua hi Eklavya Model Residential School, Gamnom Sapormeina a Class IX simlai ahi.

Amahi Pi Lhailam Haokip in gentheitah'a them ahin kichuhsah'a Eklavya Model Residential School ahung kipat'a chu athem kichuh masot dia ana sol ahi.

Satgunmang Haokip hin Mallinath International Foundation for Earth and Environment (MIFEE), Panaji Goa in organized le sponsored bol All India National Environment Talent Search Examination (NETSE) a simlai asanga sim kitet holah'a *Gold Medal* asan ahi. 

Manipur akon'a simlai hiche Gold Medal mu amabou ahi.
Asimlai chankhompi Eklavya Model Residential School, Gamnom Sapormeina akonin simlai 94 in jong Fair Performances Certificate asangun ahi.

Alangkhatna, Eklavya Model Residential School, Gamnom Sapormeina in jong Simlai Satgunmang Haokip lolhinna chunga akithang-atpi nau le akipanau aphongdoh un ahi.

School Principal cum Administrator, Dr. Ngamkhohao Haokip le staffs hon Satgunmang Haokip le adang simlai 94 hon school minphatna sangtah apolutnau chunga kipathu aphongun ahi.

Simlai Satgunmang Haokip hi lekhasim gunchu tah ahin, aphat atamjoa lekha bou gol phapen a neimi, phat ong aneikom teng Newspaper sim2 jengji mi hi.

School suty ahiteng le Kangpokpi DHQs a api Hotel bolna'a touthim manlouhel'a api akithopi kitji ahin, mi khoto themtah jong ahina bana amasanga dongjo simlai ho gelkhoh le ahetna it louhel'a holphaltah a peson jing mi ahi.

Source: 🖋Zalaileng News Service Kangpokpi District🕊