By: L Seikholen Khongsai
Masanglai chun tua Silen or Leimatak area hi tua banga hi ana umlou lai ahi. Leiset khanga hin thusim ana umcheh in ahi. Hiche thusim ho akon in gam min leh khomin ho ana kiminsah jong a ume. Silen leh Leimatak area tia ihet ujong ipi iti a area khat ahivanga amin kibang louham ti chom chan anaveote.
1. SILEN
Tua Silen Khopi hi masang laija ana umlou ahin thusima inajah jing sao thusim jong atah jong anahi Saijang Khopi tua Meithaipi Inbung mola ana umlaija Munchim in anakailhah chun tua Silen gamkai khu analon vuh chai ahi. Munkaina mun ahijeh a chu phatseh a twi veijinga ana umjeh a Siphung bolphung lentah ana umjeh a Silen tia ana minsah khah uva #SILEN tia tuni chan a kiminsah nalai ahi. Thusima kiseina a chun hiche Silen mun a chun Sampi lentah khat jong ana umin ahi. Hiche sampi chu ninou hungso don leh melmu theijin a umji e akiti. Hiche Sampi chun Ju adudan akidange anatiuve. Ju gelon khat adonsah u jongleh akham hih beh e ana tiuve. Moirang Meilhei lengte jong chun Ju donkham sah a Sana kilah ding anatiuvin hinlah judon hat vel jeh in anajou pouve anatiuve. Hiti ho jeh a hi masang lai tehse hochun siphung bolphung jong #angah ana umji e anatiu ahi. Silen kho kiminsah chu hiti chu ahi tin anakiseije. Hijeh chu tununga khulang gamkaija cheng Kuki ten ihet diu khat chu gam le gou inei houhi midang paova man louding eipaova khomin le gam min jouse register bolsoh keiding thilpha hinte.
2. LEIMATA
SAIJANG khopi munchim jeh in noilanga khun leiset kileh khup ahijeh chun chunga kisei bangin Siphung lentah khat ana ume. Hiche munchim jeh chun Vadung khat siphung bolphung phah masanga chun ana umdoh in ahi. Hiche vadunga chu lei kido ahin hiche lei kido jong chu jankah leh vadung twi chun analhoh mang leilei ahi. Nikhat lei ado chai chaijun Moirang Lengte chanu jong hiche leija chun alem in ahi. Lengpa chanu Leija alem pet a chu akhut a pahcha hoitah khat achoi ahin hiche pahcha chu leija alem pet a chu vadung twi lah a chu akhehsah ahitai. Hijeh a chu #Lei_ama_tare ati naova kona Leimata/Leimatak tia anahet den den u ahitai tin akiseije.
Tujenga jong Leimata kiti hi Meilhei hon apopular sah uva hiche gamkai Kukite gam jong hi Meilhei te paomin a umjing ahi nalaije. Hithei henlang Leimata min hi record ho ah kikhel doh thei leh thilpha tah hiding ahi. National Hydro-Power Corporation (NHPC) jong Loktak project noija Leimatak Power Station a register um nalai um ahin khonung leh eiho dia vangsetna umthei ahi. Silen Power station ana kiti theileh iti kiletsahpi umding hitam na? Athu kajah ho kahinsut khom ahin adih chet e tina a vang kahin sut ahipoi. Hetdan dangjong ana um maithei nalai ahi.
_____________________Brought to you by #Khankhologymedia
