KNF in ngehna nei

Kaybie Chongloi, 

KANGPOKPI, May 16: Anti-tribal Bills JAC in thinglhang gam ho’a 48 hr total shutdown abolding phat in ahop May nisim 18 khu a 29 channa Kuki National Front Raising Day ahitolhonin munchom chom’a kon hiche kin’a panla dingho bandh akon’a lha ong ahi nadiuvin KNF Raising Day Committee hon ngehna aneijun ahi.

Nelson Kuki, Secretary, KNF Raising Day Committee thuphon in aseina’a, kiloikhomna Raising Day hi tepchon thei ahiloule voh haithei ahitapon, thinglhang mite khotona’a kiphinna gelkhohlou jeh hilouvin aloutheilou ahinapa jeh joh in Raising Day a panla ding ho JAC lamkai cheng le volunteer hon neilha kangpeh’un tin ngehna sangtah kahin neije ati.

Manipur sung chule gampam’a kon’a jong kin opdia hunglha ding mi tampi aum’in, tuhin lung-opkai nan adimtauvin, hijehchun lungmonga kipatah’a kin ahung opcheh thei nadiuvin Raising Day Committee hon kiloikhomna thalhengin hiche kin’a hunglha ding ho jouse bandh sunga akilha ong tei nadiuvin tepna le ngehna akineije tinjong Nelson Kuki in aseibei.

Thuphon’in aseibena’a, gamsung le nam a dinga thilpha kibol, khantou machalna ding le cham le lungmon nadia nakitong ho KNF in a itih in akitosot jingin, maban’a jong kitosot jing ding ahi ati.

Raising Day hi kumseh le kimang jing ahi, gam le nam kidodoh nading le damtheina dia kilhan na jong kineiji ahi tia aseiban’a, Raising Committee thuphon chun hiche ni le hin KNF anaphutdoh Lhakehtasa Nehlun Kipgen jana le Ngailut vetsahna jong akineijin chule gam le nam adia ahinkho anaphaldoh chemasa loi le gol cheng ho geldohna le jana jong kineiji ahi ati.

Hiti ahijehchun, gam le nam a dia anakisemdoh hiche kiloikhomna ngailutna jal’a Raising Day kin opdia hung kalsong ho jouse bandh khoh lheh jong lamkah tuikah’a boina umlouhel’a JAC lamkai cheng le volunteer hon nei lha ong peh diuva ngehna kinei ahi tinjong KNF Raising Day Committee thuphon chun aseibei.