THENNA HINKHO

TUNI LHAGAO ANPHAA

(Tuesday, 31/05/2016)
----------------------------

          💧2 Cor. 7:1💧

"Hijeh chun, sopi ngaite, thutep hicheng chu ineiju ahi jeh chun hungun, lhagaole tahsa a kisuhbuohna jousea konin kisuthengu hitin, Pakai gingin thenna a chamkim in umu hite."

Tuni World No Tobacco Day ahitoh lhon in thenna hinkho ah ana kihoulim u hite.

Pakai Jesu Christan hiche Leiset a ahung chenna dinga Nungah Theng alhen banga chu Vanna achenkhom pi dinga alahtou ding ho chu Thenna hinkho mangho bou ngai/hiding ahi.

Thenna Hinkho hi jat thum in akihom khen e.

1. Christa Jesu thisan a kisop thengna (Rev. 1:5):

Koi hile Jesu Christa tahsan a ami huhhingna kisan jouse (abailam a seidin mipengthah ho) chu Jesu thisanna kisop theng ahiuvin, Pathen in amaho chu ahinvet tengle Pakai Jesu thisan jalla athenga eisim u ahi.

2. Lunggel/Lungput thengsel (1 Cor. 3:16-17):

Mihem khat chu apenthah a Christa thisana kisop theng ahung hi tengle asunga Pathen Lhagao cheng intin, hiche Lhagao chun amapui jing jeh chun alunggel ngaito ho chu theng tante. Ajeh chu Pathen Lhagao chun selepha abon a ahilchah jing ding ahitai.

3. Nun le Khan chule Neh le Chah (1 Pet. 1:15):

Mikhat chu Christa thisan a soptheng ahi'a asunga Pathen Lhagao chu achen tengle achamlou in nitin achondan, aneh adon jouse a thenna ngen hung hitante. Ijemtia nunle khan chule neh le chah a thenna hinkho aman loule amanu/pa chun asunga Pathen Lhagao achenge ati chu akikhol phat ngai ahi.

Tilkhouna:

# Achunga kisei cheng thenna hinkho thum ho hi nangin nanei hinam?

# Lunggel buoh pum, neh le don thenglou pumin, chonle khan thenglou pumin Pakai lenggam lut din kinem hih in. Ajeh chu Pakai Jesu Christan "Thenna tilou in koima Pa kom alhung ngaipoi" ati.

# Pathen lenggam lutna dinga chu Manipur a Sepoy lutna dinga ahiloule service muna dinga sum kisun thei (bribery) bolthei tobang hilouhel ahi.

# Thenna hinkho mang hih jongle Houbung member nahi man a Vangam lut jeng dia nakigel le khonung teng nakisih ding ahi.

# Thenna hinkho hi Lhagao le Tahsa ani a dinga manbeija damtheina ahi.

# Thenna hinkho hi nangle houbung mikah muding bep bou in bol hih in, Chunga Pathen mitvet joh a dingin thenna hinkho mangin.

Van munthenga cheng mikhoto them Pathen in Thenna hinkho iman jing theina diuvin phatthei eibuoh suohkei tauhen.

Kakipah E!
------------------------------
✍PK Gogou Kipgen
📲☎: 8124503398
------------------------------