JESU BANGA NGAILUTNA NEI DING

TUNI LHAGAO ANPHAA

(Thursday, 19/5/2016)

John 13:35

“Keiman nangho kangailut bang hin nang ho jong khatle khat kingailuto cheh un”

💗 Ngailutna lah a minun acha angailutna asang deh e tin akiseinai. Hijongle, hichu Christa mingailutna toh tekah thei hoi ahipoi. Ipi jeh inem itile Jesu mingailutna chu akhonna beihel a ngailutna eichansuoh keiju ahie. Pakaijin mihemte angailutna leiset a aum sung thusim chu isim tengle kidangtah tah tampi jong aume. Hiche ho chu themkhat gah veu hite:

# Koiman jong amu nomlou, sum lepthol a mi lahpeh jing pa, kaidong Zaccheus jeng jong chu Pakai Jesun Ngailutna awnem heuvin “Hung kumlhan, tujaan nain a kalhun ding ahi” atin Zacheus in a Pakai chu aga lhunge - Luke 19:5

# Danthu le khankho chedola ahing dinga jong lhingjou talou, ajonpet a kiman nu jong chu, Pakaijin Pharisee le Danthu them ho a kon a huhdoh in Ngailutna awnemseu chun “Chen tukal chonse kit tahih in” tin lungmong sel in asol tai - John 8:11.

# Juda mi ahina kiletsah pi louvin Samaria khopi (jattheng le jatbuoh kichenpolna) jotpa in, lampam twikul a chun numei noti nu chu Ngailutna kamdam awnem heuvin amanu hetthei ding dol in huhhingna thu ahilchen nalaijin ahi - John 4:1-42.

# Houhil khat ahin, mi asang ajan anung ajui a mi akidil jing laijin, seijuiten chapang ho chun ahin nailou nadiuvin aphoh uve. Hijongle Pakaijin ngailutna le khotona neitah in, “Chapang ho chu ipi dinga najah dau ham? Kahenga hinsol un” ati - Mark 10:14.

# Cross chunga athi dinga khaisanga auma chun, abolse te dingin ngailutna neitah in ataovin “Pa amaho hi ngaidamun, amahon abol u ipi ahi ahepouve” tin alaicha ding kisan in mi akhoto nalaije - Luke 23:34

💝 Hiche ho jouse hin avetsah chu: Pakaijin koima detkhen neilou in; apha, ase, ahoi le hoilou, amuol le aching, ahao avai, alen aneu ibon un mihemte hi angailu sohkeije; ti kicheh tah a eimusah u ahi.

NANGLE KEI MINGAILUT DAN:

🔷 Iheng ikom a thil ithum a eipeh loule kiguijopna lhasam jeng....

🔷 Gancha jeh pouva insah inlhang kikiboi a kiki houthei lou...

🔷 Khosunga jukham a kisen khat chu Houbunga kon a vet a kikoi jeng....

🔷 Vaicha/Neilou khat in thum ding jachat jeh a thilkhat ihetlouva ana kilah le gucha a kiman, kileusah kit nalai....

🔷 Inei kibahpi, ichan kibah pi bou kingailu a kijabol; eisanga nemjo khat kinuoise...

🔷 Mikhat chu Kangailui iti vanga Pathen henga thumvei kalval jong kitaopeh joulou....

🔷 Min eingailut le kikipah a en mi ngailut a khoto masat ding kijou lou....

🔶 Chule adang dang......

Hichu mihemte ihinau ahi. Ajeh chu Ngailut ngailut tia iseijing vang uvin Ngailut hi ipi mong mong ham tia lunggil ten a ngaito ilhom nalai uve.

TILKHOUNA:

💧 Pakaija napeh dia lom ijatvei napeh hai tam? Ahivangin Pakaijin nangailu nalaije. Hijeh chun naleibate jong ngailun.....

💧 Migiloutah nahi vangin Pakaijin nangailu lheh nalaije. Hijeh chun mi chu agilou e tin ngailut da hihhel in...

💧 Mi chu aphatmo man in vetda jeng hih in, ajeh chu Pakaijin ama jong angailut ahi.

💧 Min nabolset man in vetda jeng hih in, ajeh chu min nabolsetna nathoh a kon manbeija thahatna naneithei ahi....

💧 Ngailutna in akhonna sem hih in ajeh chu Pakaijin nang jong ngailutna amongbeija nangailut ahi.

♻ Ngailutna a dim Pakaijin, Ama thupeh ijui jou uva Ngailutna akhonnabeija kingailutna ineitheina diuvin ibon un phatthei eibuoh tauhen.

Kakipah E!

✍ PK Gogou Kipgen

Whatsapp: 8124503398

📩 gogoukipgen@ymail.com