🕊 
🇰HOCHUNGTE 
🇦WGIN 
📰
-----------------------------------------------
A heart touching story.
By: ✍ Ashat Chongloi
Kum 1984 chu ahitai. Blooming Flower School, Imphal a Class VI kasim in kachangin rented room a kana ume. Veng ningkoi in neucha room 2 bep a kisa ahin, SOLITARY COTTAGE tin kaminvo e. School kaina din kapaneo in BSA cycle khat eina chohpeh e.
School phahkon lampi pam chun mun-ong lenthim khat aum e. Jingkah seh le thinglhang nupihon anche louhing ahinpo jouvin, hilaija hin atoupi nilhum lhum jiuve. Nilhah inlam chephat ahung naihoi teng ajohlhah moh hou chu vengsung in tinna apole jiuvin manbai tah tah in aga pedohji tauve!
Saturday nilhah khat hi kintah a bu kihonna ball kichem din kaki gelle. Inter District School Sports a school minna kichem din kamin ajaove. Bubel kagah heilhan me malding katile honding kananei tapoi. Jing la Sunday ahin, me cho a joh chetei ngaiding in kakigel jotai.
Sangkhol kagah ki-ah chun kelkot lam a konnin,
"Chapa! Chapa!"
"Ka um e ipi ham?"
tia kelkot lam kagah vetle ulchim longa gihsa tah a longkai po nupi khat adinge. Ka school kom'u lampam aninglam penna touji nupinu ahichu kahepai jeng e.
"Ipi ham, Heno?"
"Chapa, me nadei lou ham?"
"Kadei nama e hung in".
Chubang ulchim long a lelnu pichu; alelna jouse kilahpeh bangin jangkhai thetnin ahung sung lhai. Kot kahong lennin abeng poh kadoplhah peh a touna kapeh le, _"Angaipoi, hiche a tou nang e"_ tin alu a pon neucha chu ala lhan, lhong laija chun apha in, kiletsah tah in atoulhai.
"Ijat jatna iti ti najoh em?"
"Chapa, nadei jat kilah inlang, anchang le kerosine nahao johjoh neipen. Sum in neipe jong le chun bazar lamma kaga choh ding ahin nisa'n eitoh tapoi".
Kenjong kakilah kham bep ding chun kerosine bottle neukhat dim kapei. Anchang le me lheh sang a tia kerosene kalheipeh ahi. Chasan kadonsah le ahingsot sotnin akipa dandan ei dalhamo leuvin kipa thu aseije.
"Chapa, tukal bazar a me ana kichohji ta hih in ken nahung thahpeh ji nange" ati.
Hiche nupinu hin nikho kahhallin me eihung thahpeh jin, manbai tah tah in eipe jie.
Nikhat hi vengsung lampi a kagah phapa kitne. Kenjong kadai ngai bang in kagah hou kitnin,
"Ipi napoh ham heno?"
"Kachapa me gathah inge".
"Ken jong kadeije".
"Kajohlou ahitai".
"Na chapa in napeh sang a tam nape nang e".
"Chutia sum hao nahile bazar a kichoh in".
"Na lunghan toh na e henu?"
A thilpoh pum in hahsa tah in ahung kiheijin phatah in ei hiven,
"Nei houloh hih in kakino e" ahinti.
Hichun ken jong ka cycle hatah in katollin, uniform kana sut lha in, cha kana om tha e. Uniform a kakivon jeh a chu ei hetlou kahetai. Ka inna bou eihetji ahi.
Ka umna ahung lhun chun longkaija ame pohho jouse chu bang ninglang achun asung lhan,
"Chapa, tuni vang ima dang neipe hih in, na sangkhol ah chulsa hijongle khat neipen" ati.
Kenjong koi ahding ati a, iti inchen u va ham tiho kadongin ahileh, lungsung tongkha tah in hitihin ahung houlim in, mitlhi longdoh leuvin hitin ahi seije.
"Chapa, keihohi Nagaland a kon hung galjam kahiuve. Napa chu galmi ten anatup jeh u chun hindoh nading ahile tia Manipur kahung jammu ahin, chutia kinaipi insungmi kanei pouve. Mipang bel sangin tin napa khom suidin akondoh e. Tehse hon gallu kichal gallu atoh e atiu chu keiho chunga alhungin, a khom suina a galmi ten ahin that tauve" tin amitlhi akitheh e.
"Napa kivui chai chun kacha alenpa chun kapa phu kalah kahsen in hunglut ponge tia anapot chu tuni channin ahung kile tapoi. Khosungmi konkhat in athi hitante atiuvin hinla ka lungthim tah in nikhatle hung teidin kagel jinge. Nang kamuni chun kachapa toh nakilo lheh jenge. Hijehchun khosung miho kom a kachapa phaicham a acheng e kati ji e".
Akipa dan dan chu chibai eibol chim theipoi. Chetange tin chibai eibol kitnin amanu la ache dehpoi. Seilou ding ding tampi jong aseijin avel vellin chibai ei chuti bollin ahile kakhou Yangnoi a Pi Kikim kageldoh in kalung ahel doh leuve.
Pi Kikim hin kholaija aki mupi ahin houloh jouse chibai abol jeng ahi. Suty teng inlam ichedoh le khosung lampi a Pi Kikim toh kikitoh jing ahi. Thudoh khat i donbut seh a chibai eibol jeng ahi.
Atupa D. Kimlet kiti mitotse khat aum in, amachun, hepi latrine a kache ding ahi iti jongle hung dam seh in tin chibai eibolle. Ka hung potte iti jongle kipa aumme tin chibai eibol jie tin totnan aneije.
Nah nah in kotphung akallhah in, kekkot aphah kah jong chun thumvei jen ahung kinung hei jin,
"Chapa, bu tam tahtah kihon jin lang haneh in ana ne jin. Me chu abei bei le kahin pohpeh kit ding ahi. Lekha phaten ana simin," tin ache tai.
Insunga katou lhonna kaki houlim lhon sangin chetange tia adindoh a pat kelkot akallhah chan chu phat saojo tei jinte. Bus akilap dong hinam kagelle kalung gimpeh lheh e.
Hetman louvin phat le nikho ana challin, kumlhun themvetna ding nikho ahung nai lhehtai. Nikho kahhalla me eihung thahpehji nupinu hi ahung kha tapoi. Bang ninga balke asunlhah jong abeitan, itih tahle ahung kitdem tin kagelgel jenge.
Saturday ni ahitai. Tuni vang akomma touji nupinu kidong hen tin kaki gelle. Me johna mun kaphah chun cycle kanga in agolla tou nupiho chu kagah vetleh, me eipeji nupinu jongchu mai lhaisellin atouve. Chomkhat amanu chu kagah vetleh kei eihin mumu chun talmehmuh in akihei mangtai. Oh! eihet kitlou hitante tin kalan, school kache paitai.
School kikhen hin atouna a chun anatou tapoi. Ka inlamma che hinte tin hatthim tah in kalhai tai. In kalhung tan amanu la kaphapa dehpoi. Vengsung dunga hung vahle hinte tin kagellin, bu kasongdoh tai. Saturday nilhah teng ball kichema kacheji jeh in bu kaki mahon ji ahi.
"Chapa! chapa"
"Kaumme hunglutnin"
Kintah in kot kahong lennin kelkot lang kagah vetle koima aumpoi. Itia umlou ham? Ole chedoh pai ahidem tin lamlen gei kachedoh in hinla kamupoi.
Monday ni school kache hin amanu anatou tapoi. Akomma touji nupinu kom a chun,
"Heno, hilaija touji nupinu chu hoija chetam?"
"Athitai"
"Hang!!! Ipi natim?"
"Athitai. Saturday nilhah chu ahitai".
"Ipidia neidoh ham? Ole Phaicham a Cheng Kachapa atichu nang nahim?"
Paodoh vah theilouvin kanuh abing dennin, ka moh khasuh thotai.
"Hapta 3 lang dammo ahitai. Sunday nikhat chu kagaven ahi. Chubanga dammo nu chun, Phaicham a Kachapa'n me honding nei taponte. Jingle kaga thahpeh ding ahi tin khangphei pocha a anche akoi chu ei vetsah e. Kachapa phatdan tin ajole apan thahkit jin, nangma thubou aseije" ati.
"Achapa neupa chu hoija umtam?
"Adammo sung chun Nagaland a kon insungmi ahungin, tuni kosana nei juntin, jingle kipui tauvinte. Keijong jaotei dia ei seju ahi genthei hahsat jeh a kahin dalhah sanjeng ahitai".
School che talouvin kintah in inlam kachetai. Cycly leitolla kamoh sotlhuh in, sakhou table chung senan kaneijin, lupna chunga chun kakhup in kalummin kachuti katai.
Chubangse laija ei ngailunu chu ipidia amin beh kanadoh lou ham! Koiphung koichang hija Nagaland hoilai kho a konna Manipur hoilai kho a cheng hiuvem tijong kahepoi. Tun kanaopa chu hoilai aum tadem! Ei seipeh thei aum dem?
Hiche thusim a datmo umtah thil thum chu:
1. Thinglhang kho a thinu hin alaitan konna Chapa chapa tia eikou chu iti Imphal tolpi a kajah hintem!
2. Itih a jong ei hekhalou nupinu hin kaumna iti ahetna Chapa chapa tia eihung kou jeng hintem!
3. Ipidia hiche thusim hi jankhat kah a kaphuthu/semthu thusim fiction ahi kati vanga asim/angai hon atahtah thusim ahisah nalai jiu hintem!
Gunchu tah a nasim jeh in Kakitaije.
Note: Picture for representation only.
🌏 *Khochungte Awgin*
🇰HOCHUNGTE 🇦WGIN 📰-----------------------------------------------
A heart touching story.
 |
| PC: INTERNET |
By: ✍ Ashat Chongloi
Kum 1984 chu ahitai. Blooming Flower School, Imphal a Class VI kasim in kachangin rented room a kana ume. Veng ningkoi in neucha room 2 bep a kisa ahin, SOLITARY COTTAGE tin kaminvo e. School kaina din kapaneo in BSA cycle khat eina chohpeh e.
School phahkon lampi pam chun mun-ong lenthim khat aum e. Jingkah seh le thinglhang nupihon anche louhing ahinpo jouvin, hilaija hin atoupi nilhum lhum jiuve. Nilhah inlam chephat ahung naihoi teng ajohlhah moh hou chu vengsung in tinna apole jiuvin manbai tah tah in aga pedohji tauve!
Saturday nilhah khat hi kintah a bu kihonna ball kichem din kaki gelle. Inter District School Sports a school minna kichem din kamin ajaove. Bubel kagah heilhan me malding katile honding kananei tapoi. Jing la Sunday ahin, me cho a joh chetei ngaiding in kakigel jotai.
Sangkhol kagah ki-ah chun kelkot lam a konnin,
"Chapa! Chapa!"
"Ka um e ipi ham?"
tia kelkot lam kagah vetle ulchim longa gihsa tah a longkai po nupi khat adinge. Ka school kom'u lampam aninglam penna touji nupinu ahichu kahepai jeng e.
"Ipi ham, Heno?"
"Chapa, me nadei lou ham?"
"Kadei nama e hung in".
Chubang ulchim long a lelnu pichu; alelna jouse kilahpeh bangin jangkhai thetnin ahung sung lhai. Kot kahong lennin abeng poh kadoplhah peh a touna kapeh le, _"Angaipoi, hiche a tou nang e"_ tin alu a pon neucha chu ala lhan, lhong laija chun apha in, kiletsah tah in atoulhai.
"Ijat jatna iti ti najoh em?"
"Chapa, nadei jat kilah inlang, anchang le kerosine nahao johjoh neipen. Sum in neipe jong le chun bazar lamma kaga choh ding ahin nisa'n eitoh tapoi".
Kenjong kakilah kham bep ding chun kerosine bottle neukhat dim kapei. Anchang le me lheh sang a tia kerosene kalheipeh ahi. Chasan kadonsah le ahingsot sotnin akipa dandan ei dalhamo leuvin kipa thu aseije.
"Chapa, tukal bazar a me ana kichohji ta hih in ken nahung thahpeh ji nange" ati.
Hiche nupinu hin nikho kahhallin me eihung thahpeh jin, manbai tah tah in eipe jie.
Nikhat hi vengsung lampi a kagah phapa kitne. Kenjong kadai ngai bang in kagah hou kitnin,
"Ipi napoh ham heno?"
"Kachapa me gathah inge".
"Ken jong kadeije".
"Kajohlou ahitai".
"Na chapa in napeh sang a tam nape nang e".
"Chutia sum hao nahile bazar a kichoh in".
"Na lunghan toh na e henu?"
A thilpoh pum in hahsa tah in ahung kiheijin phatah in ei hiven,
"Nei houloh hih in kakino e" ahinti.
Hichun ken jong ka cycle hatah in katollin, uniform kana sut lha in, cha kana om tha e. Uniform a kakivon jeh a chu ei hetlou kahetai. Ka inna bou eihetji ahi.
Ka umna ahung lhun chun longkaija ame pohho jouse chu bang ninglang achun asung lhan,
"Chapa, tuni vang ima dang neipe hih in, na sangkhol ah chulsa hijongle khat neipen" ati.
Kenjong koi ahding ati a, iti inchen u va ham tiho kadongin ahileh, lungsung tongkha tah in hitihin ahung houlim in, mitlhi longdoh leuvin hitin ahi seije.
"Chapa, keihohi Nagaland a kon hung galjam kahiuve. Napa chu galmi ten anatup jeh u chun hindoh nading ahile tia Manipur kahung jammu ahin, chutia kinaipi insungmi kanei pouve. Mipang bel sangin tin napa khom suidin akondoh e. Tehse hon gallu kichal gallu atoh e atiu chu keiho chunga alhungin, a khom suina a galmi ten ahin that tauve" tin amitlhi akitheh e.
"Napa kivui chai chun kacha alenpa chun kapa phu kalah kahsen in hunglut ponge tia anapot chu tuni channin ahung kile tapoi. Khosungmi konkhat in athi hitante atiuvin hinla ka lungthim tah in nikhatle hung teidin kagel jinge. Nang kamuni chun kachapa toh nakilo lheh jenge. Hijehchun khosung miho kom a kachapa phaicham a acheng e kati ji e".
Akipa dan dan chu chibai eibol chim theipoi. Chetange tin chibai eibol kitnin amanu la ache dehpoi. Seilou ding ding tampi jong aseijin avel vellin chibai ei chuti bollin ahile kakhou Yangnoi a Pi Kikim kageldoh in kalung ahel doh leuve.
Pi Kikim hin kholaija aki mupi ahin houloh jouse chibai abol jeng ahi. Suty teng inlam ichedoh le khosung lampi a Pi Kikim toh kikitoh jing ahi. Thudoh khat i donbut seh a chibai eibol jeng ahi.
Atupa D. Kimlet kiti mitotse khat aum in, amachun, hepi latrine a kache ding ahi iti jongle hung dam seh in tin chibai eibolle. Ka hung potte iti jongle kipa aumme tin chibai eibol jie tin totnan aneije.
Nah nah in kotphung akallhah in, kekkot aphah kah jong chun thumvei jen ahung kinung hei jin,
"Chapa, bu tam tahtah kihon jin lang haneh in ana ne jin. Me chu abei bei le kahin pohpeh kit ding ahi. Lekha phaten ana simin," tin ache tai.
Insunga katou lhonna kaki houlim lhon sangin chetange tia adindoh a pat kelkot akallhah chan chu phat saojo tei jinte. Bus akilap dong hinam kagelle kalung gimpeh lheh e.
Hetman louvin phat le nikho ana challin, kumlhun themvetna ding nikho ahung nai lhehtai. Nikho kahhalla me eihung thahpehji nupinu hi ahung kha tapoi. Bang ninga balke asunlhah jong abeitan, itih tahle ahung kitdem tin kagelgel jenge.
Saturday ni ahitai. Tuni vang akomma touji nupinu kidong hen tin kaki gelle. Me johna mun kaphah chun cycle kanga in agolla tou nupiho chu kagah vetleh, me eipeji nupinu jongchu mai lhaisellin atouve. Chomkhat amanu chu kagah vetleh kei eihin mumu chun talmehmuh in akihei mangtai. Oh! eihet kitlou hitante tin kalan, school kache paitai.
School kikhen hin atouna a chun anatou tapoi. Ka inlamma che hinte tin hatthim tah in kalhai tai. In kalhung tan amanu la kaphapa dehpoi. Vengsung dunga hung vahle hinte tin kagellin, bu kasongdoh tai. Saturday nilhah teng ball kichema kacheji jeh in bu kaki mahon ji ahi.
"Chapa! chapa"
"Kaumme hunglutnin"
Kintah in kot kahong lennin kelkot lang kagah vetle koima aumpoi. Itia umlou ham? Ole chedoh pai ahidem tin lamlen gei kachedoh in hinla kamupoi.
Monday ni school kache hin amanu anatou tapoi. Akomma touji nupinu kom a chun,
"Heno, hilaija touji nupinu chu hoija chetam?"
"Athitai"
"Hang!!! Ipi natim?"
"Athitai. Saturday nilhah chu ahitai".
"Ipidia neidoh ham? Ole Phaicham a Cheng Kachapa atichu nang nahim?"
Paodoh vah theilouvin kanuh abing dennin, ka moh khasuh thotai.
"Hapta 3 lang dammo ahitai. Sunday nikhat chu kagaven ahi. Chubanga dammo nu chun, Phaicham a Kachapa'n me honding nei taponte. Jingle kaga thahpeh ding ahi tin khangphei pocha a anche akoi chu ei vetsah e. Kachapa phatdan tin ajole apan thahkit jin, nangma thubou aseije" ati.
"Achapa neupa chu hoija umtam?
"Adammo sung chun Nagaland a kon insungmi ahungin, tuni kosana nei juntin, jingle kipui tauvinte. Keijong jaotei dia ei seju ahi genthei hahsat jeh a kahin dalhah sanjeng ahitai".
School che talouvin kintah in inlam kachetai. Cycly leitolla kamoh sotlhuh in, sakhou table chung senan kaneijin, lupna chunga chun kakhup in kalummin kachuti katai.
Chubangse laija ei ngailunu chu ipidia amin beh kanadoh lou ham! Koiphung koichang hija Nagaland hoilai kho a konna Manipur hoilai kho a cheng hiuvem tijong kahepoi. Tun kanaopa chu hoilai aum tadem! Ei seipeh thei aum dem?
Hiche thusim a datmo umtah thil thum chu:
1. Thinglhang kho a thinu hin alaitan konna Chapa chapa tia eikou chu iti Imphal tolpi a kajah hintem!
2. Itih a jong ei hekhalou nupinu hin kaumna iti ahetna Chapa chapa tia eihung kou jeng hintem!
3. Ipidia hiche thusim hi jankhat kah a kaphuthu/semthu thusim fiction ahi kati vanga asim/angai hon atahtah thusim ahisah nalai jiu hintem!
Gunchu tah a nasim jeh in Kakitaije.
Note: Picture for representation only.
🌏 *Khochungte Awgin*
No comments:
Post a Comment