NALAMLHAH KIKHUOL CHIL IN

TUNI LHAGAO ANPHAA

(Thursday, 26/5/2016)
÷÷÷÷÷÷÷÷÷÷÷÷÷÷÷÷÷÷÷÷÷÷

"Samson chu Gaza khopia achen ahileh kholai numei noti khat amudoh in amanu henga chun alut tai"
                           (Judges 16:1)

Samson chu Pathen a dinga Nazir ahin Pakai Lhagaovin ahintil khou mi chu ahi (Jud. 13:5, 25). Hijongle achunga Bible chang a kon hin Samson chonchan jat thum mutheijin aume.

1. Samson chu Pathen Lhagao jal a hat ahin, hinlah Pakai Lhagao chutoh akivop dalhan tohding tham ding khoh um jong hilou in Gaza (Israel te galmite) khopi a chun achetai.
2. Achena lou ding mun a che ahijeh in amulou dinga lom - numei notinu chu aga mudoh tai.
3. Achelouna dimun a ache a avetlou ding avet tah jeh chun abol lou ding kisan jong ahin bol tai- notinu henga chun alut tai.

JILDOH THEI HO
1. Mihem khat chu asunga cheng Pathen toh akiguijopna Lhagao ahin lhakang teng alhagao lampi chu avah jou ji tapoun achena lampi amu loujeh chun achena dia mun lomlou ana lhung khajin ahi.
2. Achena lou ding mun alhun teng bolding akihet ji pon chuteng alunglut louna ding thil in alunglut jin ahi.
3. Chuguoh keu hilou in, manthah na lama lhalut kahitai ti jong akigel doh jipon, ama tahsa lam ngaichat asubulhit ji tai. Ajeh chu asunga cheng Lhagao anungsun tah jeh chun atilkhou ding le ahilchah ding dang aumji poi.

TILKHOUNA:-
1. Nasunga cheng Pathen Lhagao chu sunuoh hih in, ajeh chu Satan in agomkom ahol le jing ahi.
2. Pathen Lhagao nalhakang teng navet na lam jouse le nakiheina lam jouse a Satan in nakipalna ding thang nado peh jing ahi.
3. Tahsa lam hihen Lhagao lam hijongle "don't just simply go without a purpose" Ajeh chu Satan in nalhahsam na ahetlhih jing ahin, bulu (attack) louhel in nadalha ponte.
4. Samson chu Pakai Lhagao jal a mihat ahi. Hijongle Pakai ja Nazir ahina sumil in Ache'na lou ding muna achen; avetlou/adei lou khat chu adei chan; abol louding thil abol tan, ajonan jumle jaa thoh pumin agalmite khut ah athilo tan ahi.
5. Nangle kei jong ichuom ihipoi. Pathen in thahat/boltheina eipei tin kiletsah pi hih in, nalamlhah na chu injole ajona thina hikhante.

Hatchungnung Pathen in Nitin ilamlhah hou ikivet phat uva ama deibanga ium theina diuvin phatthei eibuoh tauhen.

Kakipah E!
~~~~~~~~~~~~~~~~~~~~~~
✍PK Gogou Kipgen
Whatsapp: 8124503398
~~~~~~~~~~~~~~~~~~~~~~