CHI BANGIN AL-UN

TUNI LHAGAO ANPHAA

(Wednesday, 25/05/2016)

÷÷Thadou-Kuki version÷÷

~~~~~~~~~~~~~~~~~~~~~~

Matthew 5:13

"Nangho Leiset chi nahiuve. Chi khu tam tale ipia ki-alsah kit ding ham? A-al lou teng panna bei ahitan, akipaimang jin, min keng in chotphan aneiji tai"

Hiche lai Bible chang a Pakai Jesu!n tahsan chate Chi toh eitekah uhi ipi avetsah /ipi dinga eitekah u ham?

Alhang lhuon a chun chi hi:-

1. Vannoi a mihemte hi chi umlou a damthei lou ahi (mihem khat hin itahsa a hi chi 50grm tobang kineisoh kei ahin)

2. An / bu preserve ibol sot nom a ahile chi toh ikoitha le an jong aning vah poi.

3. Chi hin nen/athenglou asukoh in ahi. Vetsah nan- twi bottle surf a nasop theng joulou khat chu chitwi in sop lechun thengset ding ahi. Chule sa asung jong khu chi abou isop le theng thei ahi.

4. Chi hin ann atuisah (gives flavour to food) in ahi.

5. Chi hin mi adangchah sah in ahi.

6. Chi jong hi hampa tha na a manthei ahi.

7. Chi hin thilkhat chu akikhelsah theijin ahi.

LHAGAO THU LAM A DIN:-

Tahsan chate Chi toh eikitekah lo nau jeh chu-

1. Chi beija mihem damtheina akivat bangin, Pathen Lhagao chenna tahsa chate lhomna mun a lungmon le kipana aum thei ji poi.

2. Tahsan chate jalla vannoi pumpi hi Pathen gotna a kon huoidoh jing nalai ahi. Vetsah nan Sodom le Gomorah khopi a chu Pathen deibanga hinkho mang / Pathen tahsan 10 beh umhen lang hile suhmang ana hilou ding ahi. Tahsan chate vanna lahtou a aum teng hiche vannoi miten gentheina nasatah ahintuo diu ahi.

3. Tahsan chate jallin setna le phatlouna (evils) ho hi doudal le suhthengin aumjin ahi.

4. Chi in an / bu atuisah bangin, Pathen ging le tahsan chate tamna mun / khosung chu acham lou a nom jeng in halna aumin ahi.

5. Chi in mi adangchah sah bangin, Tahsan chate ho hinkho a kuon in midang ten Lhagao dangchahna le Pathen thu ngaichatna anei thei jiuvin ahi.

TILKHOUNA/CHALLENGE

# Ahile sopi nang tahsan cha khat hina jal a chi banga mi ngaichat a hinkho mang nahi hinam? Ole tampadehduh nahim?

# Tahsan cha nang jalla khosung houbung sung nom a, su al jing nahi nam? Ole nang joh mi theida tah khat joh nahim?

# Nang jalla min boina le setna apeldoh ji em? Ole nangjoh boina semtu a pang ji nahim?

# Nang jalla Midang Lhagao a nadang chah sah em? Ole nang jalla lhagao lam a min thasetna anei ji em?

Min eikhuol/ counselling eibol sangin eima joh icham a iki kholchil le thilpha ahijoi. Hijeh chun nangma kikhuol in. Chi banga Nalhagao hinkho al jing nam???

Hatchung nung Vangmun thenga cheng Pathen in asim jouse Chi banga Lhagao hinkho i al-sah jing theina diuvin phatthei eibuoh suoh kei tauhen.

~~~~~~~~~~~~~~~~~~~~~~

✍PK Gogou Kipgen

Whatsapp: 8124503398

~~~~~~~~~~~~~~~~~~~~~~