-Upa H. Chinkhenthang (IAS Retd.)
Saptuam heutute tuh salam thil te sang a khalam thilte ngaithupi a ngaina zaw ding a lamet ahi uh. Hileleng Khovel a mihau leh thuneihna lianpipi nei, milian mi lal leh VIP te’ omdan, gamtat dan leh cheet dan niteng a mu i hih man un, huai te thupi leh nop tuak sa a amaute eenna hong piang ahi ding, i theih louh kal un saptuam sung ah VIP culture hong lut hi. Huchi in VIP te’ om dan a om a, amaute’ hih dandan a hih i ut uh. Saptuam mite mah in leng heutu lian i chihte VIP bang en a, VIP bang a bawl i hih man un, amaute (heutute) ah leng VIP kisakna ahihke’h VIP bang a kikoihna lungsim om hi. Huchi in, khual a zin chiang un, Pathian’ nasem chiatchiat leng heutu dinmun a dingh loute bus khawng , train a II class khawng ah tuang uh a, heutu liante bel lenna leng train a air-conditioned class khawng a tuan uh a, Airport hiam, Rail Station hiam, Bus Station hiam a Saptuamte’n na dawn in, akhual taam sung un a hoih thei pen leh a nuam thei pen ding in na zintun uh a, apai chiang un station ah va kha uhi.
Hiaibang a i chindan uh a hoih kei, hih kei ni, chi i hi kei. Paul leng khual a zin chiang in, a tunna munmun a gingtute’n na dawn in, hoihtak a kithuahpih in, apai chiang in vakha liailiai jel uhi. Paul amaute’ heutu leh a tung ua thuneihna nei ahih man a tua bang a hih ahi kei uh; Paul in amau’ tung a thuneihna neilou him hi. Hi leleng ginna a pa uleh a unau uh ahih man a tuabang a hih hi zaw uhi. Eite’n leng, i heutute uh i tung ua thunei ahih man ua hoih bawl ding hilou in, ginna a i unau uh ahih man ua i hoih bawl ding uh hi zaw hi. Hilelleng, heutu khenkhat saptuam’ tung a thuneitu ahih man ua saptuamte’n VIP bang a hoihtak a abawl uh kinem uh a, tua bang in bawl kei le uh lungkim lou a heh thei ding pawl om uhi. Huai lauh man a na hoih bawl chih om thei hi. Huai ban ah, heutu khenkhat in amau kia hilou, a sungkuan te uh nasan saptuam in tuabang a abawl ding lamen uhi.
Saptuam heutu hi in khovel a mithupi pen te hileh, saptuam a di’n Pathian leh Jesu loungal VIP omlou hi. 2016 kum a Jesu’ Thohnawnni a biakna programme khat ah khovel a mihing No. 1, American President Barrak Obama vatel a, VIP dan a vapai lou in, mipite’ lak ah bench ah vatu hi. Tuabang ahih lai in, saptuam a dinmun poimoh neite amau leh amau VIP bang in kilimsiam kha nak uhi. Kum bangzah hiam paita a jingkal khat ka vak leh, lam gei ah gari khat, amai lam a nameplate san phempham a “SECRETARY, NEICC” chih laimal gol a kigelh, governement Minister leh Senior Officerte’ gari a bang chiahchiah a kibawl ka mu hi. “Eheh! NEICC i chih Kristiante a’ hilou maw? Hiai gari a zangtu in a paina leh a hohna teng a mite’n NEICC Secretary ahi chih a theih louh khak ding uh lai a hi di eive!” ka chi hi.
Huai nung sawtlou a Manipur lam ka zin leh, Nagaland gam a khua khat ah car khat, Minister leh Senior Officerte’ gari a bangbang nameplate san a laimal gol a “PASTOR OF” chih leh a khomin kigelh hong tai ka mu hi. “Hiai pastor in leng VIP te hih dan chiing hitah e! A paina teng a mite’n pastor ahih lam a theih louh khak ding uh lau a, ama a pengkul mut khawmkhawm a vak hi dei eive! ka chi nawn hi. Mi khat kiang a ka gen leh, “Nagaland a pastorte’n a gari ua hichi bang gelh thangsak uhi,” chi in hon dawn hi. Ahi tak in Saptuam pawl tuamtuam a heutute a gari mai ua “EXECUTIVE SECRETARY OF” ahihke’h “SECRETARY OF...” chih ban a a pawl min uh gelh pawl om tham uhi. A -ut teng in thauh phal hileh, a gari tung ua meivak san kipei velvel, ‘VIP light’ heutu om tham ding un gingtakhuai hi.
Lamka ka hong tun leh, saptuam pawlpi khat in a semtute uh quarterte “Officers’ Quarters” chih tak ding chi uhi, chih thu na kigen hi. “Officer” chih bang chihna hiam chih English Dictionary tuamtuam ka et leh, hichi khawng in kigelh hi: “Officer is someone with an official position in an organisatino, society or government department;” “Officer means...one who holds an office of trust, authority, or command.” Hiaite a pat in, saptuam’ office a mohpuakna neite leng “Officer” chih sese a-ut ua leh chih theih thou uhi, ka chi hi. Hileleng, Kristian khangthu ah Pathian’ nasemte “Officer” chih a om lam uh kizalou, a quarter te uleng “Officers’ Quarters” kichi ngeilou a, a taangpi in “Missions Quarters” khawng kichi hi. Tuabang ahih man in, Officers’ Quarters” chih deih sese te’n “Mission nasemte” ahih ke’h “Semtute” chih ngaineu a, solkal a officerte khawng ngaithupi zaw a, eeng a, amau bang bang a “Officer” kichi ut uh hi ding in ka ngaihtuah hi.
Source: Huihkhi via Zogam Today
No comments:
Post a Comment