TUNI LHAGAO ANPHAA
(Wednesday, 01/06/2016)
^^^^^^^^^^^^^^^^^^^^^^
Prov. 27:1
"Jing nikhoa dingin kiletsah hamhoitho boldan; ajeh chu itobang nikho ahung lhun ding nahepoi"
Tuni a din hiche Bible changa kon a ilahdoh nom pentah u chu kiletsah/Lhagao a Kiletsah hi ahi.
Tahsan chate Lhagao hinkho a dia tijat umpen tah chu Lhagao a Kiletsah/Hoitho hi ahi. Ginchat loubeh in mi tampi, hou lamkai ho kisan jeng jong hiche chonset nahi kipalna suongpi ana hijingin ahi.
Tahsa a kiletsahna chu kichangvahchoina, kihisahna, kiboltheisahna, minoisena, mi ijaselouna, kiphatseina, ama boltheina a kisong, etc ho ahibanga chu Lhagao lama jong chutama chu ahi. Lhagao lam a jong mikhat chu iti lhagao in lhagaomi jongle hitia hi ahung umteng Pakai dinga thet umtah mi kisohji ahitai.
Bible a Lhagao a kiletsah mithemkhat hinkho gahveu hite.
1. Mariam & Aaron:
Israel te nampi lamkai pipu Mose chu akithopi dingin asopinu Mariam le Aaron chu Pathenin alhen ahin, hitoh lhon chun amanin jong ajochan in pan ahinla jing lhonin ahi. Hinlah engset manjeh in alungsung lhonah kiletsahna le hoithona ahin neihon tan, asopi pa Mose jah a chun keini jong Pathen manchah khat kahi hon hilou ham tin ahung kiletsah lhon tan ahile, Pathen in Mariam chu adeng in ahung phahlha jengtan ahi - Num. 12:1-10.
2. Saul: Israelte leng masa pen, atahsa melput jong ahoijin, mijouse chungvum a asangin, mi vetnom umtah chu ahi. Israelten Pathen henga Leng athumu ahitoh lhona Pathenin Saul chu ana lhenpeh ahi. Hinlah lenga ahung pan til a Pakai ging mi ahivang chun alungsung hoitho nale kiletsah nan ahinluo phat chun Samuel Thempupa kilhaina ganto ding chu aman aboltan ahi. Hinlah Pakaija din kipana sangin lunghan na joh ahitan, Saul in lengvai apoh sot loudi tai atilon ahi - 1 Sam. 13:8-14.
TILKHOUNA:
# Thuchih jihpa chun kiletsahna hi manthah nan ajuipai jenge atin ahi.
# Lucifer jeng jong chu aloupina kiletsah pi a aumjeh chun vana konin sotlhah in ahung umtai.
# Ahile sopi nang ijatvei Pathen in napeh boltheina jat chuom chuom ho a chu nakiletsah khah tah em?
# Pakai amatah jong aloupina dalha a kineosah a vana kona hiche leiset a hung kumlha ahin, kiletsah/hoitho na kiti him him athetbol ahi.
# Mihem nangle keijin bon tahsa thil a mikhat ahung kiletsah/hoitho le kimu nomlou ahin, Lhagao a kiletsah chu Pakaijin athet mong ding ahi.
# Hijeh chun i lhagao hinkhou kikhuol u hite, injole kiletsah jeh a Pakai thet a ium di chu tijat umtah ahi.
Nunnem Pakaijin kiletsahna dalha a kineosah na hinkho iman jing theina diuvin phatthei eibuoh tauhen.
Kakipah e!
------------------------------
✍PK Gogou Kipgen
📲☎: 8124503398
------------------------------
No comments:
Post a Comment