PAKAI KEI KAHIM?

Wednesday, May 18, 2016

(Self-Counselling)

TUNI LHAGAO ANPHAA
(Wednesday,18/5/2016)
-------------------------

Matt. 26:22

"Chuin amaho chu nasatah in alunggim un, chule Ama henga chun 'Pakai Kei Kahim?' tin ban neichan khat khat in ahin dong tauvin ahi"

📍 Pakai Jesun a lei ministry a dinga anungjui mi 12 alhendoh ho chu asopi bang bangin abol in, ahasat nau aboinau jouse a apan hu in, athina diu mun jenga jong ahuhdoh jin, thilkidang abolho jong amit tah uvin amusah uvin ahi. Hitobang thilloupi le chanvou loupi tah changkha ho chu iti hamphat hitauvem! Pakaijin amanchah ho kal a vannoija mihampha koima umlou ahi.

📍 Amavang, Pakaijin mi chujat aching athem lah a chanvou loupi changdinga alhen chu hepha lou in; Jesu adiuva aphatna hojouse sumilin; mikhat hin amachang oitumpoh ding gelnan a Pakaipa chu dangka in akijoh doh tan ahi. Hichun akiloikhom nau chu ichan hamkhat in asuling lau tan ahi.

📍 Chuin, Jesun, nalah uva hin eipedoh a pangding mikhat naumuve tia ahin sei achun, ipi ti tam? Koiman nang nahim? Ole Ama ham? tin asei pouve. Ama cham tah uvin amaho le amaho self-counselling akibol uvin ahi.

Aban nei chan “Pakai kei kahim?” tin aban ban in ahung kidong tauvin ahile, achainan aginchat loubeh u, sumchinga anganseu Judas Iscariot jong chun ‘Pakai kei kahim?’ tia ahin sei achun, Pakaijin – “Nasei khai” atitai.

📍 Seijui 12 ho chun, self-counselling bollouvin Nang nahim? Ama ham hitia uma chu? tin kidongto leu amaho kikah a boina soh a thudih pot theilou maithei ahi. Hinlah, amaho le amaho Pakai leh amaho kikah a self-counselling akibolu chun seitam di umlou in baicha khen chan amimo pen chu akiman doh pai jengin ahi.

TILKHOUNA LE JILDOH THEI HO:

# Mihemin amachang ding bou akigel ji teng amaseh seh aboiji pon midang kinepna kisan asunoh phah theiji e. Hichu ahile, inamsunguva mihem hijat hin amachang seh a dingbou kigel a hinkho iman u hin nampi ichan geija akahset ding hitam! Ngaiton….!

# Mihemte hi Pakaijin ihina ding lomtah tah a eikou/einganse jiu ahin, hinlah hiche kalval a ichon tengule tahsa le lhagao a changval a pat  nampi changeija boina alom loma kise ji ahi.

# Insung damthei louna, Houbung damthei louna, Nampi damthei louna ho hi; amichang cheh in self-counselling bol louva, nang nahi, ama ahi tia kingoh to jing ihijeh u ahi. Ibon un Pakai Seijuite bangchun “Pakai kei kahim?” tiu hitin Pakai henga kikhuol leuhen boina ho nitinin kemjing tante.

Pakaijin nangle keijong “Pakai kei kahim?” ti self-counselling ineitheina diuvin phatthei eibuoh tauhen. 

Kakipah E!

✍ PK Gogou Kipgen

Whatsapp: 8124503398
📩: gogoukipgen@ymail.com