"LHAGAO THENG THAHAT"

Sunday 15th May 2016

TUNI LHAGAO ANPHAA

📝PK Gogou Kipgen
-------------------------------

Acts 1:8
"Amavang Pathen Lhagao Theng nachunguva ahung chuh tengle nanghon thahat nanei dingu ahi."

Solchah masate ho khang, Pentecost ni a houbung hung kiphutdoh khang thudol  Louthem Luke in Theophilus henga asut chu isim tengle Pathen guon Universal le Local Church design chu imu diu ahi. Tulai khang houbung umdan toh akikhehel jengtan ahi.

Achomlam in gah veu hite:

1. Pathen Lhagao Theng achunguva ahung chuh phat chun amahon Lhagao thahatna anei tauvin ahi.

2. Aguh a gicha tah a indan chungnunga akikhop u chu mipi le japi muthei din ahin tahlang un mipin amaho chu ahin bom tan ahi.

3. Pakai Jesu mat a auma jammang kei ho chun Jesu nungjui ahinau ahin phongdoh ngam tauvin ahi. Pakai seilep pa Peter jeng jong japi lah a dingdoh in nanghon nathau Jesu chu Christa/Messiah ina nga jingu chu ahi tin ngampel in asamle tai.

4. Niseh in kilungtoh tah le thakhat in Pakai ging pumin akikhomun Pathen thu chu ahillhang le un tahsan chate chu apung tul tul jengin ahi.

5. Christa a tipumkhat vetsah nan aneijouseu neilhangin aneikhomun; hichehi keija, hiche nanga ti aum pouve.

6. Pakai min jallin hesoh, genthei, chule gimbolna tampi jeng jong thina geijin ana thoh lhumkei uve. Vetsah nan- Stephen.

7. Amavang, aumlou khat aume. Hichu houbung kikhentelna (Church division/denominational division) ana neipouve.

TULAI HOUBUNG:

1. Houbung masa ho umchan sagi kiseilah a khun amasa gup khu inei beh tapouvin, amahon ana neilou Church division le denominational division hi simseng louvin inei tauve.

2. Houbung masa khang a chun Pathen thuhil lhang chu responsibility in anabol uvin, tukhang in occupation/proffession in inei tauve.

3. Pathen Lhagao Theng hung kumlhah a chun kilungkhat le thakhat nan anei uvin, tulai khangin tahsan dan kibahlouna in inei uvin khotin a houin akop kop in inei uvin, nangho keiho ikitito tauve.

4. Houbung masate chun Pakai gingpum a kikhopna ana neijiu ahin, tukhangin member a kon a kikah louna ding maimai le society khat hina jal a kikhom maimai itam tauve.

5. Houbung masa khanga chun tahsan cha apung tul tul in, chule hichu ana boipiu ahin; hinlah tukhangin tahsantah le Pakai ging alhom deu deu in houin/houbung apung tul tul jenge.

TILKHOUNA:
Tuni Pentecost Kut ni ahitoh lhon in avelin Pakai henga kilhandoh in-

#Christa a tipumkhat ihinau chonchan (practical) in podoh tau hitin, nangho keiho tia kikhenna pailha tau hite.

#Houin punsah dingbou tup lou in Tahsan chate apunbe nading joh in pan latau hite.

# Gospel thulhangsap hi proffession hilouin imopohnau ahi tin lan tahsan chate jousen tomngai tah in kipana
 thupha hi ijochan in hillhang leu hite.

#Khatle khat kidehto a kiseisettona a phat isuhmang sang uvin; khatle khat kitilkhouto nale, alhasam khat panhuna, kitaopeh to na in iphat u joh mang tau hite.

#Khatle khat kimithip le engset pum a hilouin Pakai ging pumin Houin kai tau hite.
Hichu  tahsan chate chonna dinga Pakai deisah chu ahi.

Pathenin asim jouse ibon un; Ama igin theina diu, khatle khat kingailuto a ihin theina diu, Gospel thutah pu a hangsan tah a iphondoh jing theina diuvin; Phatthei eibuoh suohkei tauhen.

Kakipah E!